發表園地

發布日期:2015年05月22日

心歹、喙歹罔phò-tāu

         「知人，知面不知心」，是teh講欲認捌一个人，真簡單就有法度看出伊的外在，煞真歹了解伊內心的想法；所以講若無經過長時間的鬥陣佮觀察，真歹看出一个人的好歹，毋才有這句「心歹無人知」。若是歹喙，人一聽就知，sian掩嘛掩袂牢，閣伊對人的損害，一時得就予人感覺著，所以人會講「喙歹上厲害」。

         咱佇遮欲較深入來討論「喙歹上厲害」這層代誌，並毋是「心歹無人知」，所以歹心就較無要緊，其實拄好顛倒反。「歹心」逐家攏知影是無好，失德的，抑若「歹喙」，定定會hông忽略、忽視，閣會揣理由替人抑是家己辯解，像講啥物「有心無喙」、「刀仔喙豆腐心」，這種kâng安慰的話；漸漸予人對歹喙的代誌失去警覺，造成一寡無必要的誤解，甚至食官司。所以，佇遮欲閣一擺強調，歹心佮歹喙平平嚴重，攏是無好，人毋才會共「存好心、做好代、講好話」，這3句話囥鬥陣。歹心、歹喙攏愛改，毋過歹心是品行的問題，欲改恐驚無遐簡單，若是歹喙是慣勢的問題，欲改有較簡單淡薄ah，定著愛鼓勵人緊共這个歹習慣改掉。

         紲落講歹喙，有伊的坎站佮層面，坎站就是伊嚴重的程度，層面就是有針對性抑是無針對性；有針對性就是teh講特定的人，按呢有牽連著話語的輕重，若無真細膩，較會發生糾紛；若是無針對性，就是家己罔唸、罔肏（tshoh）爾爾，事實講是無犯人khia，毋過，會較無人緣。有針對性，抑是無針對性，牽連著人、事、時、地、物複雜的議題，毋是咱佇遮講會清的；所以咱下面欲論的是歹話的坎站佮程度。

         所有的語言無懸低級之分，任何一種語言攏有優雅（抑是尊敬）、中性佮粗俗的語詞這種分別，內面上緊學、上濟人會曉的當然是粗俗的語言；所以一種語言，若無好好仔教育佮推展，一寡優雅的語詞會消失，tshun落來大部份攏是較粗俗的，這就是語言的危機；真不幸，咱的台語目前就是處佇這个危機內底，按呢咱較捷聽著的，全全是一寡較粗俗的語詞，莫怪予真濟人誤解，叫是台語是較低級的。遮有幾个現況會使來證明，第一，請問在座有幾个人有讀過台語文獻，就是用台語寫的冊，若無那有可能學著文雅的台語。閣來咱的媒體佮電視劇，按怎teh鄙相台語，採訪的議題抑是事件，先用語言共過慮過；電視劇內底，懸階層的頭家、醫生、律師等等，攏講華語，抑若司機、工人、傭人這个階層的，就tsiâu講台語，這種語言的歧視，造成人會誤解，叫是台語是較低層的人teh使用的語言，莫怪一般人對電視頂，學袂著優美的台語。

         繼續講一个發生過的案例。真濟人以為講著一寡較粗俗的話，就是咧kâng罵，甚至有一寡中性的台語詞，煞予人誤用佮誤解，遮咱日後愛好好仔來教育佮糾正。我佇成功大學服務的時，接著法院寄來請教台語詞的問題，就有一个人去hông告毀謗，講伊kâng罵「你這个查某」；事實上「查某，查某人」這个詞是一个中性的詞，若欲認真分會當按呢分，婦仁人（優雅）、查某人（中性）、柴扒（粗俗）、破媌（下流），論真講使用中性詞，欲共判斷是kâng毀謗，有較不足的所在。這種分法，佇日常生活當中猶閣真濟，像請用餐（文雅）、來鬥陣食飯（中性）、提起孝孤（粗俗），所以，對語言使用的精確度，是需要教育的。

         紲落閣有1个案例，是我佇報紙看著的，是有關社會語言、文化層次的問題；就是講有一个阿嬸去予in侄仔告伊毀謗，法官閣判in阿嬸輸，真正是無天理，毋捌字兼無衛生。這个案例是按呢，一个大人大種的查埔人，定定轉去共阿媽討錢，in阿嬸看袂做lih，共罵講：「你這个四尺九的，遮無效，家己毋討趁閣轉來共阿媽伸長手」，煞去予法官判伊講是「罵人家狗，毀謗，要罰款」；看著這條新聞，我險吐出來，明明是做阿嬸的，看袂做lih，teh教示伊講，5尺以上的查埔囝，毋去討趁，定定轉來討錢，無路用，按呢判毀謗，講是罵人狗，這个法官的頭殼真正是貯屎的。

收合

發布日期:2013年06月11日

走揣古早的鶯歌

雺霧罩天 看袂著日頭

發布日期:2013年06月11日

高一生與春之佐保姬

是誰在森林的深處呼喚 寂靜的黎明時候 像銀色鈴鐺一樣 華麗的聲音 呼喚著誰 啊 佐保姬啊 春之佐保姬啊

發布日期:2013年06月03日

語言接觸和接觸語對本土語言的衝擊之二：被同化不僅是語言文字，還有文化特色

語言接觸後，語音不斷被同化，文字亦然。南方朔曾說，大眾文化下，文字也有簡化之虞，方便了許多是事實。只是文字的簡化，使得字元減少，也可能使人們藉著複雜的語言文字以承載複雜思想的能力減退。

發布日期:2013年05月15日

語言接觸和接觸語對本土語言的衝擊之一：《分類國語一字多音審訂表》的效應

教育部去年 (2012)十二月十三日公告了《分類國語一字多音審訂表》，大家霧裡看花「花嗄嗄」，老師、學生、家長一陣錯愕，也引來媒體討論，這不也恰好彰顯了語言接觸 (language contact)後的接觸語 (contact language)，或所謂「洋涇濱」(pidgin < business)現象，所衍生諸多的問題？