駐站名家

咱心愛的台語歌 

——康軒寒假研習心得之武雄老師篇

今年的舊曆新年有較早，寒假一下開始歇，隨就倚年跤兜矣，學校無閒煞，才欲無閒過年，各位台語老師閣撥工來參加研習活動，予人真感心——康軒的安排嘛誠用心，特別邀請著一等一的流行歌曲作詞人王武雄老師，分享《我心愛的台語歌》（講題），武雄老師一向真少出來演講，這次會當來到康軒的研習會，機緣實在難得。

台語歌 詞 武雄 曲 施文彬、武雄

想欲寫一首台語歌　不知愛用啥　來做韻腳
祖先有智慧的教示　這嘛的少年仔　無愛聽

想欲唱一首台語歌　不知欲唱乎　誰人聽
現代上流行的物件（近來上直接的情歌）　阮的序大人　因聽袂合

其實台語歌　愈聽愈耐聽　有世事的議論　有人情的描寫
其實台語歌　愈唱愈好聽　置紛亂的時代　安慰著你甲我

我心愛的台語歌啊～　有鄉親心內的心聲
只要音樂若續拍喔～　唱來就有感覺
我心愛的台語歌啊～　是土地溫暖的溫泉
只要歌詞若感動喔～　愈唱就愈時行

這條〈台語歌〉，收佇2009年施文彬《歹勢》專輯內底，武雄老師的演講上起頭先，就佮逐个分享這條歌的MV，相信在場對台語有熱情朋友，一定真會當體會。這條歌詞，應該會當代表武雄老師對「台語歌」的心聲，武雄老師的風格，嘛有親像這支MV，畫面按怎走，攏干焦看著主唱的尪仔頭，伊坐邊仔，抑是後壁面，詞寫甲遮呢好，鏡頭煞攏故意調霧霧，無愛予人認伊有。

講著心愛的台語歌，武雄老師擲出真濟問題，刺激在場的朋友思考，佇有問有答有禮物獎勵的熱烈氣氛下，探討台語歌的現狀佮困境，也分享伊的觀察心得佮創作經驗。欲寫台語歌，先愛台語講會好勢，聲調音韻才會熟。一條歌若無順台語的音韻去寫，聽起來，毋是意思聽無，就是會感覺khê-kô。已經寫過七百外條台語歌詞的武雄老師，對家己的要求真嚴格，伊的作品，聲調韻跤一定攏有合咱台語的原則，各位老師會當介紹學生唱伊的歌，保證無問題的台語歌。

台語作詞人，是予台語歌靈魂的人；一條歌，因為詞是台語的，才會是台語歌。佇語言生態對台語真不利的現此時，台語歌的傳播功能更加重要，向望有人會因為台語歌，想欲學台語，較煩惱的是咱台語敢會終其尾干焦賰台語歌？

2012年，金曲奬的最佳作詞獎〈阿爸的虱目魚〉，就是武雄老師的作品，其他猶有誠濟的「武雄金曲」，各位台語歌友一定攏真熟。網路發達的時代，youtube欲聽啥攏揣有，google嘛欲查啥攏撈有；不而過，有部落格（忘了跳舞的熊）嘛有fb的武雄老師，是一張個人相片攏無出現佇網路哦！袂當翕相品代先，隱私管控做甲真徹底——這場研習，可比本尊親授的台語歌詞研習密會，錯過的朋友只好期待無定有後回。